$国藏集团(00559)$ 獲$恒大地产(03333)$ 及美國太陽能公司SPI入主，轉型太陽能業務，昨日股價一度升逾倍。國藏去年初仲叫緊「華藝礦業」，改名「國藏集團」之後轉行賣酒，上個月先公布話要收購北海道度假村項目。點知轉個頭，就向恒大發行308.13億股新股，變相賣盤。轉行又轉行，轉到班小股東頭都暈。
有份入股國藏的SPI，全名Solar Power, Inc.，在美國場外交易議價板上市，主要業務在美國。至於恒大除咗足球隊，仲有百足咁多爪，按照劇本，國藏前景應該可以「煲」到好大。
太陽能股今年跑贏風電股，成為最當炒的新能源股。$协鑫新能源(00451)$ 暫時係菲菲首選，噚日又破頂，不過無貨在手的話，菲菲建議不如轉吼$联合光伏(00686)$ ，或者有得追落後。
發電業務漸上軌道
聯合光伏現時最大單一股東是招商新能源集團，持有19.18%，國企背景，先加一分。上半年該公司收購6個正在營運的太陽能發電項目，成功帶動業績扭虧為盈，賺3.92億元。該公司第三季發電量錄得19.19萬兆瓦時，按季大幅增加32%，反映其太陽能發電業務已逐漸上軌道，可望帶來穩定收入。
早前聯合光伏宣布終止與$保利协鑫能源(03800)$ 的合作，導致股價急挫，不過該公司第三季至今已先後收購多個太陽能發電項目權益，與保利協鑫「分手」相信對其前景影響有限。聯合光伏股價已消化上述負面消息，昨日表現標青，技術上MACD呈正突破訊號，周綫圖亦顯示升穿死亡交叉，短期重上1元應無難度。
花花世界
蘋果iPhone 6無用到藍寶石玻璃屏幕，搞到供應商GT Advanced Technologies（GTAT）要宣布破產保護，市值一日蒸發超過九成。蘋果同GTAT決裂的箇中原因眾說紛紜，唔知來龍去脈嘅，都以為GTAT被蘋果跣鑊甘。
聽聞GTAT同蘋果簽約時，GTAT的藍寶石玻璃仲未量產，雙方都係賭一鋪，後來發現GTAT技術原來未到家。之不過蘋果的最壞情況只係iPhone 6用返Corning供應的強化玻璃，但GTAT就賠上成家公司，而好有可能，蘋果將會接管GTAT的藍寶石玻璃廠，基本上蘋果係無得輸。有時候賭都要睇吓對手係邊個嘅。
