女人都愛扮靚，如果以後去美容院，可以一條龍直接整埋容，係咪好正呢？做開醫療同牙科服務嘅$康健国际医疗(03886)$ ，噚日宣布以4.24億元收購$卓悦控股(00653)$ 旗下美容業務。不過，吸引萬千神州同胞幫趁嘅化妝品零售店，卓悅就繼續自己保留。
康健話，相信卓悅美容龐大嘅客戶基礎，可為佢哋規劃中嘅美容皮膚醫學中心轉介客戶。康健向卓悅配售3.65億股股份來支付，相當於公司擴大股本7.33%。配股價每股1.16元，較噚日收市價1.19元折讓2.52%。
康健收購嘅卓悅美容國際，喺香港、澳門同內地經營悅榕莊、Dr Protalk同埋水云莊（圖）等品牌，共19間纖體美容及保健中心業務。該業務舊年收入為3.18億元，增長5%，盈利3431萬元，增長20%。康健話，計畫發展一個美容皮膚醫學中心，提供先進皮膚醫學治療，仲包括整形外科治療。
