恒指微升，但炒風依舊。光大總公司重組獲國務院開燈，未來將轉為股份制公司，意味架構有望化繁為簡，對釋放價值及引入資金有莫大幫助，消息刺激旗下龍頭$中国光大控股(00165)$ 喪升15%，挑戰去年雙頂阻力13.66元，升破將可上望16元。改革概念股乘勢崛起，央企誠通集團旗下$中国诚通发展集团(00217)$ ，一棍突破旗形，五毫子冇走雞。
首站先睇1元
另一方面，滬港通又有新消息，港交所（388）鐵定本月底進行開車預演，中港券商股聞雞起舞，早前推介嘅$国泰君安国际(01788)$ ，曾創上市新高，氣勢甚強，今日將公佈業績，稍後再同大家跟進。
今日推介另一券商股$金利丰金融(01031)$ ，今年僅升15%，相對其他同業以倍計升幅，落後得過份，只要將差距輕微收窄，即屬大茶飯級數。金利豐主打三瓣業務——金融服務、酒店及博彩、證券投資。金融服務包括證券經紀、包銷及配售及IPO融資等，去年EBITDA達8.6億銀，按年增長47%，佔比達64%，屬主要收入來源。金利豐股價舉步為艱，相信與市場預期其澳門酒店及博彩業務增長放緩有關，但現價PB僅0.66倍，比證券同業trade緊溢價，已平咗一截，如果同濠賭股比，更加係落後幾條街，一旦資金殺到，要炒起話都冇咁易。金利豐周線圖呈大圓底走勢，現價0.86元買入，首站先睇1元，中線目標上望2011年高位1.25元，潛在升幅45%，屆時PB都未夠1倍。
唐牛
