《兩件一周》《am730》見報三次，本月9日推介$威华达控股(00622)$ ，暫時跑出，噚日最高累升32%。場內$中星集团控股(00055)$ ，同威華達好似，一樣係淨現金多，有「私家殼」、憧憬注資質地，而中星現價仲殘過08金融海嘯價，抵博。
中星前稱中大印刷，2009年先改名，英文名改埋叫「Neway」，正係Neway卡拉OK掌舵薛嘉麟家族上市旗艦。
中星現價(0.199元)，相對08年金融海嘯最低價0.3元，潛水33%，相對2011年高位4.95元(上年10合1)，大跌近96%，大股東所佔上市公司呢part家底，跌剩7,287萬銀。
又中星淨現金1.96億銀，幾乎睇齊最新總市值2億銀，銀彈勁多同時，再證集團殘到不堪。老老實實，中星若要透過印刷業支持股價，升番上4蚊，可能性唔大。要大、小股東大享增值，兼有前景，其中最直接途徑，莫過於注資。
2007年，報載薛氏家族有意將私人卡拉OK業務上市，當時估值高達10億銀，係中星家陣市值5倍！
而隨住夜場Magnum(02080)成功上市，條例亦開綠燈。數咁計，中星翻一番到0.4元，資產折讓仍然高達50%，而總市值先上到近4億銀，仲未對應到Neway卡拉OK當年10億銀估值。即係話，大股東一係唔搞注資，若果落實，中星股價，係會放紙鳶。
作者為中細價股專家
