$博耳电力(01685)$ 《報告速評》第一次同大家見面,顧名思義,係作為精明投資者點樣評論返大行報告,我們會搜羅報告值得細味嘅觀點,等你睇得精叻,唔會照單全收。美資大行富瑞(Jefferies)最新將博耳電力(01685)刪除在研究範圍以外(Dropping Coverage),理由係研究團隊重新調配資源(reallocation of resources),唔通話俾你聽「唔再花時間」研究博耳?博耳去年11月俾內地一篇分析文章狙擊,質疑賬目同應收賬大增背後嘅問題;眾所周知,來來去去只有Jefferies為博耳「護航」,話公司有「獨特的商業模式」,又話會派高息云云,目標價睇到23.6元!點知股價頂唔到幾耐,呢家更可以用「體無完膚」來形容,股價由最高峰的18元樓上,跌到近期在3元附近浮沉。Jefferies唔認錯,只係在4月上旬再出報告,將目標價勁劈六成二去到9元,仍然比當時股價大概6元高出五成,不過股價依然未止瀉,今次Dropping Coverage,似乎有點「投降」感覺。今次俾大家嘅啟示有:1)大行往往後知後覺,尤其係只有一兩間唱好某公司,更要小心,唔好對目標價咁認真啊!2)當分析話公司具有「獨特商業模式」(business model)就要好小心,一句說話點可以解釋不合常理的高利潤率呢!作者簡介:蘭尼,專業散戶,喜歡用常識睇大行報告。