$鳄鱼恤(00122)$
何傲兒唔簽無綫，一甩身就狂晒比堅尼噴血靚相，又開到口準備歌影視同步發展，不過就蛇咬都唔肯講會去邊間公司。日前終於公佈去向，就係簽約俾契爺兼「爺孫戀」男主角——林建名(大少)旗下嘅大名娛樂。今日大少間公司仲幫傲兒BB買咗個全版廣告，仲話唔使契女戴夢夢插手。因為之前有報道話戴夢夢唔鍾意何傲兒加盟嘛……而依家喺大名娛樂擔任經理人嘅夢夢就話：「根本冇呢件事，唔應該咁講，今日嘅儀式係我同我嘅團隊諗出嚟，如果係阻撓都唔會搞呢件事。」

今日傲兒BB就喺尖沙嘴一間酒店舉行簽約儀式，嘩，唔講真係以為係婚禮添。林建名帶埋契女戴夢夢出席，傲兒BB就帶埋爸爸同家姐何傲芝出席。大少身穿西裝打煲呔，傲兒BB就白色tube dress 紗長裙，似足婚紗。

簽約儀式前，大會先播片，有葉蒨文、李克勤及鄭少秋等都有拍片道賀。傲兒BB先喺台上謂:「多謝傳媒，我想佢哋出現時，佢哋就出現；唔想佢哋出現時，依然喺度。好多謝佢哋提醒我時刻要做好自己，亦都好多謝發明爺孫戀嘅人，憑空創作咗咁多精采嘅對白。到依家我都仲記得。」

何傲兒再謂:「到今日爺孫戀終於喺工作上……記住係工作上，修成正果。你哋(指傳媒)係功不可抹。」

講完呢番話，司儀就介紹「爺孫戀」另一主角——林建名出場喇。真係估佢唔到，竟然係大少玩魔術，將將椰奶，溝埋檸檬汁嘅酸，再倒出嚟，原來變出嚟嘅，係四卡鑽石。不過就唔係戒指。

好喇，到簽約儀式，雙方家長(即係何傲兒爸爸同家姐)同大少契女戴夢夢等都有上台見證，仲影大合照，但何傲兒爸爸同「女婿」就冇影兩人合照。

簽完埋身契，夢夢陪契爺走先，契爺話唔做訪問。記者問佢粒石幾卡？大少話:「四卡。」約值多少？大少話:「錢係唔重要。」