$第一视频(00082)$ 遭喝止提問第一視頻股東報警


仍然停緊牌嘅第一視頻（0082），噚日朝早開股東周年大會，主席張力軍no show，由獨董陸海林頂上，再由公司秘書代行表決程序。會上有位坐前排嘅趙姓股東代表想發問，點知畀一個著黑色Tee 嘅魁梧大漢喝止，趙生話： 「呢度係中環喎，使唔使咁呀？」。後來會內有人報警，勞動到兩位警察先生去到會場了解吓。

雖然趙生無得問問題，但佢要求數飛同公布點票結果就獲准。最終關於批准年報報告、董事酬金、委聘核數師、重選主席張力軍、獨董王臨安嘅動議有超過60%股東贊成而通過。授權董事會配發20%額度股份，同擴大授權董事配發及處置股份動議，反對票比例多咗，有超過43%，但同樣過半數票獲通過。不過提出無限期延期舉行大會表決收購瘋狂體育嘅動議，就獲97%大比數通過。

完會後黑Tee 男即閃，兩個警察捉唔到人，唯有捉住趙生問幾句。雖然家睇嚟第一視頻大股東地位唔易動搖，之但係贏咗場交，輸咗股東之間個和氣就唔好啦。