中州爆炸力驚人
個市跌到七個一皮，但完全冇嘢炒？肯定唔係！細價股旺到不得了，昨有50隻股票漲8%或以上，早排畀咗兩隻股票魏力、兩隻都即日飛升4成嘅線人又來料，「畀隻堅殼過你，研祥智能（2308）。」有幾堅先？「睇成交九成九狂炒。」睇幾多呢？「單計殼價5億都個六啦，但近排好多炒到10億8億先賣，真係唔奇喎！」

滬港通在即，大折讓H股反地深吸力，不少更屢創新高，上月5.7元水平推介的南京熊貓（553），沿著10日線完美爬升，新高在望。H較A目前折讓48%，隨著滬港直通，差價會進一步收窄，呢隻熊貓大有機會變身「龍貓」，目標10蚊！

另一隻淡市破頂股中州證券（1375），專做散戶生意，食正A股旺勢，加上市值僅17億銀，細細隻爆炸力驚人，隨時可逆流而上！上半年純利增長34%至1.79億人仔，單計8月已賺5,407萬，按月增長52%，較上半年月均淨利潤飆78%，步伐明顯加快！建銀報告預期，全年純利將達3.5億人仔，按年勁增38%，料可輕鬆達標；未來兩年估計再增長40%及20%，動力超強。中州昨漲5.6%，收報2.65元，創上市新高，估值平冇蟹貨，以18倍PE計可見3.4元。