$星光集团(00403)$ 魚樂無窮：兩個例子分好壞殼股
殼股搶手乃不爭事實，細碼公司獲洽股權嘅通告，幾乎日日都有。正因熱潮有氾濫迹象，戰友入場更加要識揀。格菱控股（1318）上周四晚表示，主要股東持股獲洽購，睇番格菱盤數，連年蝕錢雖符合賣盤基本要求，但財務狀況則不敢恭維︰長短債合接近6億人仔，但手頭現金卻不足3,000萬人仔，意味新主要畀多7億港紙找數，值唔值真係見仁見智。最近中期業績顯示，公司最新權益更從4,000萬人仔淪為虧絀，簡單啲講就係負資產！一隻股份冇資產back up，跌起上嚟真係冇底線可言，格菱上周五高開後倒跌收場，絕不令人意外。相反，一隻有資產、有現金、有派息嘅細價股，就算賣盤誘因相對較低，炒起上嚟都安心啲，講緊嘅就係主打包裝材料、標籤及紙類製品嘅星光集團（403）。點解話佢賣盤誘因低？事關近兩年已扭虧為盈，舊年中期仲派特別息，現價息率超過5厘。

星光平靚正有權爆升睇財務狀況更吸引，淨現金1.1億元，市值2.5億元，現金比率四成幾，夠吸引！每股NAV1.06元，現價0.485元，PB只得0.46倍，平得可憐。大股東林光如夫婦揸貨近六成，從任何角度出發，都係一隻完美靚殼。殼股有價有市，星光身價點計都唔應該脫節得咁緊要，係咁意用4億元市值計，股價可見0.76元，潛在升幅57%，到時PB都只係0.7倍，萬一真係有人approach，相信呢個價只係中途站。

唐牛