由創業板升呢上主板，可以為一間公司增值幾多？1億？2億？答案係可以無限大。吓？又話創業板殼價3億銀，主板殼價5億銀，明碼實價，最多咪多2億銀！無錯，殼價照計最多2億銀，但一間公司成功轉板，一定有亮麗業績支持，再加上好多基金白紙黑字唔准染指創業板股份，升呢後肯定惹來機構投資者敲門，屆時公司以幾何級數壯大，又點會單係殼價升值咁簡單呢？
$英裘控股(08168)$ 上月宣佈，已正式向聯交所入紙申請轉板，意味有關程序已進入直路，公司最新市值7億銀唔夠，可塑性大得驚人。英裘主要從事狐狸及水貂毛皮貿易，以及水貂養殖等，主要從丹麥、芬蘭及加拿大拍賣行採購毛皮，單睇業務已知夠獨特。
事實上，公司創辦人兼主席黃振宙，喺毛皮行業有近30年經驗，與拍賣行合作無間。根據拍賣行數字，去年每張貂皮及狐皮平均價格，按年分別升23%及55%，著名品牌Fendi、Hermès及Gucci亦正陸續發佈新一季設計，四個字講晒︰有價有市。
成交急升
春江鴨積極
英裘業績亦交足功課，單計去年四度發盈喜，截至6月底止首季盈利增長38%至1,248萬銀，預計11月公佈中期業績，話唔定又會有驚喜畀大家。點解咁講？股價及成交畀咗答案大家。上周成交量全部講緊幾十球，仲升穿9月高位0.315元，唔通轉板有好消息？當然得個估字，但春江鴨如此積極，小注跟炒一轉無傷大雅，目標先睇0.45元！
唐牛
