一直有賣盤概念嘅景福集團（280）換主席，年近60嘅楊秉樑因為需要投放更多時間喺其他事務，而辭任主席與董事職務，改由佢72歲嘅哥哥楊秉堅接掌公司。
景福早於2014年中提過，控股股東同多位潛在投資者洽售股權，當時仲刺激股價飆升，可惜最終傾唔成，跟住呢兩年自由行威力大減，公司業績都麻麻哋，截至舊年9月底止中期虧損接近6,000萬元。公司家換咗年紀較大嘅阿哥做主席，會唔會更加顯示，佢哋無心戀戰呢？