撰文：唐牛/蘋果日報 2015年5月18日

半新股$永盛新材料(03608)$，上周五宇宙大爆發，創上市新高。空穴來風，未必無因，一切要從兩份通告說起。

上月中，公司宣佈杭州先臨訂立合資建議，註冊資本1,000萬人仔。合資公司主要從事PLA及ABS等絲材3D打印材料研發、生產及銷售。「嘩！淨係3D打印四粒字都夠晒噱頭。」

好戲在後頭，杭州先臨全名杭州先臨三維，顧名思義，公司主要提供3D技術綜合解決方案，屬國家級高新技術企業，客戶包括成都飛機設計院、航天材料與工藝研究所等，又飛機又航天，說穿了又係國策概念股一隻。公司喺新三板掛牌，今年累積升幅1.6倍！重點來了，睇睇公司管理層，吓？原來杭州先臨同永盛新材料主席係同一人——李誠！

去到本月初，永盛另一份通告，令整幅圖畫變得更清晰！簡單而言，公司將紡織相關原材料貿易業務，售予同為大股東嘅李誠，收益唔多，251萬人仔，但公司講明會將更多資源投放喺毛利率較高嘅實體業務，講緊邊瓣？戰友自己想想吧！

永盛最新市值奀豬8億，有近兩億現金揸手，李誠持股逾五成，業務可謂想點變就點變。上周五大棍崛起，成交創上市以來第二高，一個飛上枝頭變鳳凰嘅故事，正式誕生了。